البنت الحلوة /// Yazan Alsadeq
فزعت من نومتها الحلوة
مسحت شعرا بريحة مية
وراحت تركض لمرايتها
شافت صورة مش صورتها
نزلت ع خدا دمعتها
شافت ضو بعتم الليل
فرح وزينة وقهوة وهيل
سمعت زغرودة من بعيد
وشافت ناس وشافت خيل
مسروجة بجوهر يتغنى
تحمل ورد وذهب وحنة
صفنت سرحت حزنت مالت
ع مرايتها الحلوة وقالت:
هذا البيت اللي بالصورة
نفس البيت ونفس الصورة
بعرف ساحاته وابوابه
وشجراته وحجرات اعتابه
بس الزينة وضو الليل !
والحنة عظهور الخيل !؟
ع مرايتها سالت دمعة
تحرق مثل دموع الشمعة
صارت غصة بقلب الحلوة
صوت ينوح وصرخة تدوي:
يا اهلي، يا اخواني وسندي
لسه الزهر ف عمري مندي
بعده ما فتح بعده ما زهر
بعده الحلم ف روحي بيكبر
سمعت صوت القهر يجلجل
والدمعة بتناجي الدمعة:
ليلة بكرة حنة ايدك
وعرس الحلوة يوم الجمعة
Y.S
تعليقات
إرسال تعليق